Orduya dəstək
Gürcüstan Müsəlmanları İdarəsi Azərbaycan Ordusuna dəstək nümayiş etdirib
Tbilisi Cümə məscidində Azərbaycanın ərazi bütövlüyü uğrunda döyüşən qəhrəman əsgərlər üçün dualar oxunub, şəhidlərin xatirəsi ehtiramla anılıb.
Mərasimdə çıxış edən Gürcüstan Müsəlmanları İdarəsinin şeyxi hacı Ramin İgidov, Ruhanilər Heyətinin üzvü hacı Kamran Məmmədov, Gürcüstanın Azərbaycanlı Ağsaqqallar Şurasının sədri hacı İsak Novruzov və başqaları torpaqlarının azadlığı uğrunda əks-hücum əməliyyatı aparan Azərbaycan dövlətinin mövqeyini dəstəklədiklərini bildiriblər.
Qeyd olunub ki, 30 ilə yaxın bir vaxtda BMT-nin qətnamələrinə və bir çox mötəbər beynəlxalq təşkilatların bəyannamələrinə məhəl qoyulmur və torpaqlarının 20 faizi işğal altında və bir milyon qaçqını olan bir xalq, təbii ki, bu haqsızlıqla barışa bilməzdi. Bu gün dini, milli və irqi mənsubiyyətindən asılı olmayaraq hər bir kəs zülmə, terrora, zorakılığa qarşı çıxan, ərazilərini işğaldan azad edən bir dövləti, xalqı dəstəkləməlidir.
