Könüllülük
Cəbhəyə könüllü yollanan azərbaycanlı tanınmışlar
Artıq 6 gün idi ki, cəbhəboyu ərazilərdə torpaqlarımızın işğaldan azad olunması uğrunda döyüşlər gedirdi və Azərbaycan gəncləri könüllü olaraq cəbhəyə yola düşürdülər. Onların arasında məşhur idmançılar, sənətçilər və vəzifəli şəxslərin övladları da var idi.
Birinci Avropa Oyunlarının qalibi, taekvondoçumuz Ayxan Tağızadə də hərbi xidmətə çağırılıb. O, bu barədə sosial şəbəkə hesabında paylaşım edib. Qeyd edək ki, o, taekvando məşqçisi Əvəz Tağıyevin ailəsində dünyaya gəlib.
Bir digər idmançımız MMA döyüşçüsü Tofiq Musayevdir. 30 yaşlı idmançı cəbhə xəttinə yollanıb. Qeyd edək ki, qarışıq döyüşlər ustası olan Tofiq Musayev indiyədək keçirdiyi döyüşlərdə 18 dəfə qalib gəlib.
“Bakı” klubunun sabiq futbolçusu Valeh Seyidov da cəbhə xəttinə yollanıb. Qeyd edək ki, Valeh Seyidov “Bakı”nın sabiq vitse-prezidenti Yaşar Seyidovun yeganə oğludur.
Bakı Şəhər Baş Polis İdarəsi (BŞBPİ) Dövlət Yol Polisinin bölmə rəisi, polis polkovniki Vaqif Əsədov da oğlunu cəbhəyə yola salıb. Polis rəisinin oğlu Pərvin Əsədov könüllü olaraq döyüşə yollanıb.
Cəbhəyə yollananlar sırasında tanınmış azərbaycanlı dicey Rövşən Həsənov da (DJ Roshka) var. Onun ordu sıralarına qoşulması ilə bağlı məlumatı dostları verib.