Orduya dəstək
Lənkəran Dövlət Dram Teatrı Silahlı Qüvvələrə Yardım Fonduna ianə edib
Lənkəran Dövlət Dram Teatrının kollektivi Silahlı Qüvvələrə Yardım Fonduna müəyyən məbləğdə ianə edib.
Bu barədə məlumat verən teatrın direktoru Tofiq Heydərov bildirib ki, rəşadətli Azərbaycan Ordusunun respublikamızın ərazi bütövlüyünün bərpası və tarixi ədalətin bərqərar edilməsi uğrunda apardığı mübarizə hər bir ölkə vətəndaşı kimi, lənkəranlı sənətçilərin də sevincinə və ruh coşğunluğuna səbəb olub. Müzəffər Ali Baş Komandan, Prezident İlham Əliyevin başçılığı ilə həyata keçirilən zəfər yürüşləri, hər gün onlarla yaşayış məntəqələrimizin düşməndən təmizlənməsi əminlik yaradır ki, üçrəngli Azərbaycan bayrağımız tezliklə Şuşada, Xankəndində dalğalanacaq.
“Ordumuza dəstək olmaqdan ötrü bizim kollektiv də Silahlı Qüvvələrə Yardım Fonduna imkan daxilində vəsait köçürməyi özünün mənəvi borcu sayır. Çalışacağıq ki, bundan sonra da bu fonda pul vəsaiti köçürək. Bu gün hamılıqla bircə istəyimiz var - azad olunmuş Şuşa şəhərinə qastrol səfərinə getməklə orada tamaşa oynamaq!”, - deyə T.Heydərov bildirib.