23
Oktyabr

23 Oktyabr

Orduya dəstək

Qarabağ qazisi: Otuz ildən bəri həsrətində olduğumuz Qarabağımızdan şad xəbərlər eşidirik

Hər gün Azərbaycanımızın bir parçası olan və otuz ildən bəri həsrətində olduğumuz Qarabağımızdan şad xəbərlər eşidirik. Eşidirik ki, şanlı ordumuz erməni işğalçılarının tapdağı altında olan o yerləri təmizləyərək irəliləyir. Füzulimiz, Cəbrayılmız, Zəngilanımız, Hadrutumuz, Suqovuşanımız, Xudafərinimiz, çoxlu sayda kəndlərimiz azad edilib. Zəngilanımızdan sonra İranla olan bütün sərhədlərimiz tam nəzarətə götürülüb. Artıq torpaqlarımızın işğalçılardan tamamilə azad ediləcəyi gün yaxınlaşır. O gün ki, uzun illərdən bəri həsrətindəyik.

Bu sözləri Kürdəmirdən olan Qarabağ qazisi, II qrup əlil Hikmət Əsgərli söyləyib.

Mən birinci Qarabağ müharibəsində döyüşmüşəm. Bugünkü Azərbaycan o vaxtkı ölkə deyil. Ordumuz, hərbi gücümüz, müasir silahlarımız və döyüş taktikamız bizləri fərəhləndirir. Erməniləri və onların havadarlarını isə təəccübləndirir. Bütün bunlara görə Prezident, Ali Baş Komandan İlham Əliyevə minnətdarıq. Qazanılan uğurlar məhz Prezidentimizin düşünülmüş iqtisadi, siyasi, hərbi, diplomatik fəaliyyətinin nəticəsidir. İnşallah ailəmlə tezliklə Şuşaya, sonra da Kəlbəcərə gedəcəyəm. O yerlərin suyunu içəcək, havası ilə nəfəs alacağam. Bax, o zaman birinci Qarabağ döyüşlərində çəkdiyim əzablı günlər mənim üçün yalnız bir xatirə olaraq qalacaq”, – deyə Hikmət Əsgərli bildirib.

Azərbaycan Ordusunun sentyabrın 27-də işğalçı Ermənistan silahlı qüvvələrinə qarşı başladığı əks-hücum əməliyyatında əldə etdiyi möhtəşəm qələbələr haqqında bundan sonra kitablar yazılacaq, filmlər çəkiləcək. Amma indidən tam əminliklə deyə bilərik ki, cəbhə uğurlarımızın ən başlıca səbəbi Prezident, Ali Baş Komandan İlham Əliyevin həyata keçirdiyi güclü dövlət, güclü ordu strategiyası, milli birlik və döyüşçülərimizin ruh yüksəkliyi idi.