07
Oktyabr

7 Oktyabr

Orduya dəstək

Moskvanın Food Sity agroklasterində fəaliyyət göstərən azərbaycanlılardan ordumuza dəstək

Moskvanın Food Sity agroklasterində fəaliyyət göstərən azərbaycanlılar torpaqlarımızın işğaldan azad edilməsi uğrunda mübarizə aparan Azərbaycan Ordusuna dəstək məqsədilə Azərbaycan Respublikasının Silahlı Qüvvələrinə Yardım Fonduna 105 min manat ianə edib. Maliyyə vəsaitindən əlavə olaraq orduya lazım olan ləvazimatlar da göndərilib.

Moskvada çalışan azərbaycanlılar müzəffər Azərbaycan Ordusunun tezliklə tam qələbə qazanacağına əmindirlər və hər zaman ona dəstək verməyə hazırdırlar. Soydaşlarımız torpaqlarımızın işğaldan azad edilməsi uğrunda mübarizə aparan orduya davamlı şəkildə yardım edəcəklərini bildiriblər.

Hər şey Vətən üçün! Qarabağ bizimdir, Qarabağ Azərbaycandır!

Xatırladaq ki, Silahlı Qüvvələrə Yardım Fondu Azərbaycan Prezidentinin 2002-ci il 17 avqust tarixli Fərmanı ilə yaradılıb. Fond Azərbaycan Respublikası Silahlı Qüvvələrinin müasir tələblər səviyyəsində inkişafını təmin etmək, onun maddi-texniki bazasını möhkəmləndirmək və zəruri sosial tədbirləri maliyyələşdirmək məqsədilə yaradılıb.

Azərbaycan Ordusunun sentyabrın 27-də işğalçı Ermənistan silahlı qüvvələrinə qarşı başladığı əks-hücum əməliyyatında əldə etdiyi möhtəşəm qələbələr haqqında bundan sonra kitablar yazılacaq, filmlər çəkiləcək. Amma indidən tam əminliklə deyə bilərik ki, cəbhə uğurlarımızın ən başlıca səbəbi Prezident, Ali Baş Komandan İlham Əliyevin həyata keçirdiyi güclü dövlət, güclü ordu strategiyası, milli birlik və döyüşçülərimizin ruh yüksəkliyi idi.