Xarici media
Misirin geniş oxucu auditoriyasına malik “Almasryalyoum” portalında Azərbaycan Prezidenti İlham Əliyevin İspaniyanın EFE informasiya agentliyinə müsahibəsində ATƏT-in Minsk qrupu həmsədrlərinin ünvanına səsləndirdiyi tənqidi fikirlər yer alıb.
Portalın xəbərində dövlətimizin başçısının müsahibəsindən aşağıdakı sitat önə çıxarılıb: “Mən demişəm ki, Minsk qrupu heç bir nəticə əldə etməyib. Lakin mən, eyni zamanda, demişəm ki, onların fəaliyyətinə tamamilə göz yuma və onları yalnız tənqid edə bilmərəm. Çünki hazırda masada olan əsas prinsiplər Minsk qrupunun köməyi ilə işlənib hazırlanmış prinsiplərdir. Beləliklə, onlar işlədilər, çalışdılar. Lakin onlar əraziləri boşaltması ilə bağlı Ermənistana təzyiq göstərmək üçün əllərində olan bütün alətlərdən istifadə etmədilər. Bu ölkələrdən hər birinin birtərəfli qaydada Ermənistana təsir etmək üçün kifayət qədər vasitələri var, istər hərbi dəstək olsun, istər siyasi dəstək, iqtisadi dəstək, diaspor dəstəyi və s. Lakin onlar əllərində olan bu alətlərdən istifadə etmədilər, onlar BMT Təhlükəsizlik Şurasının daimi üzvləri olaraq özlərinin qəbul etdikləri BMT Təhlükəsizlik Şurasının qətnamələrinin icrasında israr etmədilər”.
Xəbərdə qeyd olunub ki, Prezident İlham Əliyev hazırda BMT Təhlükəsizlik Şurasının qətnamələrini Azərbaycanın özünün yerinə yetirdiyini vurğulayıb.
