Günahsız qurbanlar
Bərdənin Yeni Əyricə kəndinə atılan raket 16 yaşlı gəncin ölümünə səbəb olub
Ermənistan silahlı qüvvələri beynəlxalq hüququn norma və prinsiplərini kobud şəkildə pozaraq, dinc əhaliyə qarşı terror əməllərini davam etdirir.
Noyabrın 7-də düşmən tərəfin silahlı birləşmələri tərəfindən Bərdə rayonunun Yeni Əyricə kəndinə raket atılması nəticəsində 2004-cü il təvəllüdlü Rəhimov Şahmalı Ətraf oğlu həlak olub.
Şahmalının əmisi oğlu Rafiq Rəhimov deyib: "Partlayış səsini eşitdik. Gedib gördük ki, Şahmalı yerə yıxılıb. Qəlpə ona dəymişdi, elə orada da həlak oldu. Düşmən terror əməllərini davam etdirərək dinc sakinləri hədəf alsa da, onlardan qorxmuruq. Dünya erməni terroruna sussa da, müzəffər ordumuz onların cəzasını verir. Əminik ki, tezliklə ordumuz torpaqlarımızı erməni terrorçularından təmizləyəcək".
Qeyd edək ki, Şahmalı Rəhimov Ağdam rayonu 94 nömrəli köçkün tam orta məktəbin 10-cu sinif şagirdi idi.
